Adab dan Ilmu (Petuah Ayah)

Baradaik mako bajalan. bajalan macari ilmu

Oi nak kanduang sibirang tulang. ubek jariah palapeh damam.
dangakan ayah bapasan nak. Kok nyampang sampai di masonyo, bajalan juo lah ka rantau. mancari ilmu untuak bekal hiduik dunia jo akhirat.
adopun di subarang nagari nan ka ditampuah, pituah urang dulu paralu diingek nak oi. 'Dima Bumi Dipijak, Disitu langik dijunjuang," kok baiak katokan baiak pagunokan saelok-eloknyo. kok buruak jan lansuang malapeh kato 'itu buruak'. Diamkan sajo dulu, sabab di rantau awak surang. ba etika kok kamangecek.
Bajalan paliharo kaki, manjombo paliharo tangan. mangecek paliharo lidah.
kok bajalan, caliak-caliak ladang urang nan katalendo, kok manjombo, caliak-caliak jan punyo urang nan taambiak. kok mangecek baitu pulo, caliak-caliak hati urang nan katasingguang nak oi.
Mako, nan paliang utamo dari ilmu tadi tu iyolah adab, nak oi. Paralu ditekankan ka anak nan ka bajalan. Mambaok adaik kamano kaki malangkah itu paralu. Jiko adaik lah malakek ka badan diri, dima awak tagak, disitu urang kan sanang.
...
#Moeda #LineArt